Tan iyo dhamaadkii sanadka 2022ka, waxaa ka socday deegaannada SSC-khaatumo dagaal u dhaxeeya dadka deegaanka iyo ciidammada Somaliland. Dagaalku wuxuu sababay khasaare naf iyo maalba leh, barakac baahsan, burbur hantiyeed iyo duqayn goobaha bulshada sida Masaajidda, Isbitaallada, Iskuullada, iyo Goobaha-ganacsiga. Wuxuu kaloo saamayn ku yeeshey dagaalku nolol maalmeedka bulshada, ammaanka, iyo horumarka deegaanka. Haddaba, xarunta Cilmi-baarista ee Bayaan waxay samaynaysaa xog-ururin ku aadan dagaalka ka socda gobolka Sool. Xog-uruurintaan waxay muhiim u tahay in si cilmiyaysan loo darso sida dagaalku ku billowday, saamaynta dhaqan-dhaqaale ee uu gaystay, sida dagaalku u saamayn karo doorashooyinka Somaliland iyo Puntland, doorka uga furan Dawladda Federaalka Soomaaliya, iyo saadaal ahaan meesha uu ku danbayn doono masiirka gobolka SSC-khaatumo. Sidaas awgeed, xarunta Cilmi-baarista ee Bayaan waxay si sharaf leh kaaga codsanaysaa inaad ka qayb qaadatid xog-ururintaan. Xarunta Cilmi-baarista Bayaan waxay ballan qaadaysaa in ay ilaaliso xogta gaarka ah ee xogbixiyaha.